03:23 م
الأحد 16 يوليو 2023
القاهرة- مصراوي:
أعرب الفنان رامي صبري عن تقديره وحبه للملحن محمد رحيم، مؤكدًا أنه خانه التعبير ويعتذر له أمام الناس.
واعتذر رامي وكتب في تعليق على منشور لـ رحيم: “وأنا كمان بحبك وانت عارف ولو كان خاني التعبير أنا بعتذرلك قدام الناس انك فهمتني غلط، وأنا مقدرش أزعلك أبدا. موضوع الشبه في الأغاني انت عارف إن الموسيقى في العالم سبع نغمات وكلنا بندور حولهم”.
وتابع “ولو مسكنا مين شبه مين هانطلع تقريبا معظم الأغاني شبه بعض وده شيء طبيعي وبيحصل (توارد الأفكار). مرة تانية رحيم ملحن وفنان كبير جدا أحترمه وأقدره وزعلك فوق راسي”.
كان الملحن محمد رحيم خرج عن صمته وذلك بعد مداخلة الفنان رامي صبري الهاتفية ببرنامج “أجمد 7 مع جيهان عبدالله” عبر نجوم إف إم في وجود الفنان عمرو مصطفى بعد تصالحهما بعد الخلاف الذي نشب بينهما بسبب أغنية “يمكن خير” لرامي صبري والتي قام عمرو مصطفى بحذفها من على “يوتيوب” نظراً لاتهامه بسرقة اللحن والتوزيع الخاص بها إلى جانب حقوق الملكية الفكرية الخاصة بأغنيته “رقصة” والتي أكد على أن اللحن والتوزيع مسروق منها ليتم حذف الأغنية بالفعل.
ونشر محمد رحيم مقطع فيديو للمداخلة الهاتفية لرامي صبري عبر حسابه الرسمي على “فيسبوك”، وقال فيها الثاني: “في 2013 لقيت الملحن محمد رحيم قال إن الأغنية –قاصدا بشرة خير- دي شبه أغنية من أغانيه وطلعت هاجمت رحيم لأن هو ضايقني فكرة أنك بتهاجم نجاح وعلى الرغم من حبي ليه كملحن لكني اختلفت معاه كصديق واختلفت معاه عشان خاطر عمرو مصطفى”.
ليقوم بعدها محمد رحيم بإضافة عدد من أغانيه بالفيديو إلى جانب الأغاني التي قام مغنيها باقتباس جمل لحنية منها، بينها أغنية “أنا بحب عيونك” 2002 للنجم عمرو دياب، مشيرا إلى أن رامي صبري قدمها في أغنية “مش أنا” عام 2005، أغنية “مشاعر” عام 2013 للفنانة شيرين عبدالوهاب واقتبس منها رامي صبري في أغنيته “وعد مني” عام .
وأوضح الملحن محمد رحيم موقفه من رامي صبري وعمرو مصطفى تفصيلاً قائلاً :”أولا يعلم الله سبحانه وتعالى اني معنديش أدنى وقت أضيعه في اني أدخل في أي مواضيع نظرا لانشغالي بمجموعة أعمال مهمة جدا إن شاء الله الناس هتشوفها قريب، ولكن تعليقا على مشكلتك انت وعمرو مصطفى اللي الحمد لله اتحلت في مداخلة إذاعية وربنا ميجبش زعل أبدا بين الأخوات، ولكن للأسف اللي حصل إن اسمي تم اقحامه من طرفك بشكل لا يليق ونظرا لأن المداخلة كانت على إذاعة مشهورة فطبعا اتسمعت من بعض أفراد عائلتي ومنهم بنتي، وأكيد قطاع كبير من جمهوري اللي بيحبني وبيحترمني وبيحب أعمالي فوجب إني أرد عليك بكل حب واحترام، علشان أوضح وأصحح المغالطات اللي حصلت في المداخلة”.
وتابع “انت قلت في المداخلة بالنص إنك سنة 2013 هاجمتني بنفسك علشان أنا كنت (بحارب نجاح ) كان أخويا الفنان عمرو مصطفى حققه وقت ما قدم أغنية بشرة خير، وكأن أنا راجل معنديش حاجة أعملها غير إني أهاجم وأحارب الناس الناجحين وانت اللي وقفت في وشي !!، وده طبعا كلام مغلوط ومسيء ولازم أصححه وأبين للناس الحقيقة اللي سكت عنها سنين احتراما للعشرة الطويلة والصداقة اللي بتجمعنا كلنا، أولا أنا الحمد لله مش ناقص نجاح وتاريخ بفضل الله سبحانه وتعالى علشان أهاجم أي حد ناجح ربنا يعلم اني بدعي في صلاتي بالرزق والتوفيق لكل الناس وبتمنى الخير للجميع، اللي حصل ساعتها اني علقت أن لحن بشرة خير شبيه إلى حد التطابق لعملين من أعمالي”.
واستكمل “وهم أغنية لا كده عاجبين للمطربة الصاعدة إيمان سمير وأغنية كل ده يطلع منك للنجمة شيرين وجدي والأغنيتين صدرا سنة، (2004) يعني قبل صدور لحن بشرة خير بـ 9 سنين على الأقل ونظرا لنجاح بشرة خير وفرحتنا كلنا بيها أنا قفلت الموضوع تماما ومرضيتش أبين للناس انا بقول كده ليه!!!، ولكن الفيديو اللي تحت ده هو الفيصل اللي هيبين للناس إذا كنت بخترع كلام من دماغي ولا كلامي فعلا صح بناء على علم ودراسة وخبرة، وانت طبعا راجل فاهم ودارس مزيكا برضه زينا، كما تم إرفاق لحنين آخرين من أعمالي وهما أنا بحب عيونك للفنان عمرو دياب ومشاعر للفنانة شيرين عبدالوهاب واللي حصل إني لقيت نفس اللحنين دول تم استعمالهم في اغاني خاصة بيك وحققوا نجاح كبير معاك من غير ما تضع اسمي عليهم على الأقل جنب اسمك، وطبعا الفيديو هيوضح المسألة دي جدا حتى لغير المتخصصين وواثق إن الجمهور هيتفاجئ وفيه ناس كتير هتستغرب أنا ازاي سكت طول السنين دي، والإجابة لأني إنسان مسالم ومحترم وعمري ما اسمح لنفسي أرفع قضية على زميل وأخ ومؤمن بتوارد الخواطر وحسن النية دائما وطبعا دي مش مني دعوة للتخلي عن الحقوق ولكن العشرة الطيبة والمحبة والصداقة ليها علينا حق”.
وأضاف: “الخلاصة إنك هاجمتني قبل كده أكتر من مرة ومازلت لأني قلت كلمتين (فضفضة) هما من صميم حقي وقوانين الملكية الفكرية واضحة ومفيهاش هزار في بلدنا، وفي كل دول العالم وكنت بشوف مجهودي وتعبي بينسب لغيري وبستحمل وبسكت عشرات المرات وللأسف انت اللي زعلان وبتتهمني اني كنت بهاجم النجاح، لأ انا قطعا مش بهاجم النجاح لأنني والحمد لله صديق النجاح انا فقط كنت بعلق على استحياء وخجل على ظاهرة سلبية جدا ومتكررة في أسلوب العمل في الوسط الفني، وهي ظاهرة استغلال واستحلال مجهود الناس بدون وجه حق ونسبته لغير أصحابه الحقيقيين وأنا عايز بعد تجربتك الأخيرة مع عمرو اللي سببت المشكلة دي كلها الناس تحاول تتخيل انا ساكت على ايه بقالي سنين ولكن بعد الاعتداء على أعمالي وأفكاري ومجهودي ثم سكوتي وصمتي اطلع بحارب النجاح كمان وكمان اطلع مش عاجب”.
وانهى تعليقه قائلاً: “لأ طبعا ده كلام مرفوض تماما وفعلا انا مش هسمح لأي حد يقوله وربنا يسامح الجميع وطبعا أنا برد على الملأ لأنه كلامك كان على الملأ فلذا وجب التصحيح والتوضيح مع تأكيدي إن عمرو مصطفى طبعا أنا بعشقه وبحبه من قلبي، وانت كمان أخويا وبحبك والدليل إني أول مرة اتكلم على مواضيع زي دي حدثت منذ سنوات ولكن زي ما انت عندك أسرة وعندك جمهور تخاف على شكلك قدامهم أنا كمان زيك بالظبط مع تمنياتي بالتوفيق والنجاح الكبير للجميع أخوك الموسيقار المصري العالمي المجتهد والمحترم والمحب محمد رحيم”.
