08:05 م
الأربعاء 26 يوليو 2023
رد الفنان صلاح عبدالله، على الناقدة الفنية ماجدة خيرالله، بعد هجومها على الفنان أحمد ماهر.
وعلق عبد الله، على منشورها، عبر موقع “فيسبوك”، قائلًا: “معاكي ومش معاكي يا هانم.. ليه؟! لأن الراجل عبر عن رأيه الشخصي وإحساسه الخاص وده بيحصل لممثلين كتير في أعمال مختلفة بس ما بيقولوش، والشهادة لله عمره ما حسسنا بده أثناء العمل”.
وتابع: “وده في حد ذاته احترافية محمودة واللي فاكره كويس إننا كلنا كنا في حالة انسجام وانبساط رغم الظروف الصعبة جدًا اللي عشناها أثناء التصوير وإحنا بنسابق الزمن للحاق بالعرض الرمضاني وفضلنا نصور حتى وقفة العيد”.
وأضاف: “وأخيرًا فعلًا لم نكن نتوقع هذا النجاح الكاسح المستمر لغاية دلوقتي، وآسف للإطالة، وأرجو أن يتسع صدرك لهذا التعليق لأن دافعه حبي وتقديري لشخصكم يا أستاذة”.
وكانت الناقدة الفنية ماجدة خير الله، شنت هجوما على الفنان أحمد ماهر بسبب ما قاله عن مسلسل “ريا وسكينة”.
وكتبت ماجدة، عبر حسابها الرسمي بموقع “فيسبوك”: “نفسي أفهم لما ممثل محترف يعلن أنه كان مغموم أثناء تصوير مسلسل ريا وسكينة، وشاعر بالقلق.. ورأيه إن المسلسل لا يمكن ينجح لأن فيه تجاوزات (من وجهة نظره) أمال ليه وافق عليه؟”.
وتابعت: “حد كان غصبه يلعب الدور ويشارك في المسلسل.. أمال العبقري محمود مرسي اللي لعب دور الطاغية في (شيء من الخوف) وكان بيصدر أوامر قتل لكل من يخالفه في القرية يقول إيه؟ أو العبقري زكي رستم ودوره في رصيف نمرة خمسة أو أي من أدواره اللي لعب فيها دور القاتل الشرير؟”.
وأضافت: “الأزمة الحقيقية اللي بنعيشها دلوقتي هي خلل المعايير لدى من نعتبرهم فنانين، إذا كان الفنان المحترف الدارس بيخلط بين دوره أو شخصيته في الحقيقة وشخصيته الدرامية اللي ممكن تكون لرجل تقي أو لشيطان رجيم، يبقى الشخص العادي الملعوب في دماغه يقول إيه؟”.
الفنان أحمد ماهر، قال في تصريحات تليفزيونية بأحد البرامج: “أنا بدأت أشتغل فى مسلسل ريا وسكينة، وأنا ربنا اللي عالم بيا، حاطط إيدي على قلبي أوي وحزين، وقولتلهم حتى يأجلوا عرضه لبعد رمضان المشكلة هنا إن المشاهد معظمها مظلمة، الديكور مظلم عشان نقرب من الشكل الحقيقي، الإضاءة مظلمة وكل يوم بنخنق في ستات عشان نقلعها صيغتها ونحفر وندفنها.. ففعلا بروح وأنا مغموم للوكيشن”.
وأضاف: “فكنت براقب الوقت وهو عمال يجري ورمضان داخل علينا وأنا جوايا يقين إن المسلسل ده مش هيتشاف لأن الدنيا صيام وشهر العبادة وكان فيه بعض الألفاظ الخادشة في النص الحقيقي، اتعدلت فيما بعد.. وتأتي الرياح عكس التوقعات، ومع أول عرض للمسلسل شوفنا بقى الصدى والنجاح اللي حققه المسلسل ما شوفنهاش في أي حاجة قبل كدة”.
