“بيصعبوا عليا”.. عمرو أديب تعليقًا على انتظار أولياء الأمور لأولادهم أمام لجان الامتحانات

11:02 م


الأحد 18 يونيو 2023

كتب- محمد أبوالمجد:

قال الإعلامي عمرو أديب: “إن مصر تتميز بخصوصية في امتحانات الثانوية العامة وكل عام بنلاقي ناس بتصوت وتصرخ ودائمًا خناق والنهارده لا، فالأمور اليوم تبدوا كانت أهدأ شوية من كل سنة”.

وأضاف “أديب” خلال تقديمه لبرنامج “الحكاية” على فضائية “إم بي سي مصر” اليوم الأحد: “أن طلاب الثانوية العامة دول عرسان وعرايس ناس كبار في حياتهم العادية بينزلوا ويتأخروا ويخرجوا ويتخانقوا وشخصيات اعتبارية أنا انا نفسي بقى أولياء الأمور وخاصة الأمهات تسيب ولادها يروحوا لوحدهم كفاية بقى تعب”.

وتابع: “الأمهات بيصعبوا عليا بيقفوا قدام اللجنة في الشمس على الرصيف عطشانين وتعبانين وكل دا مستنين المحروس أو المحروسة خلاص يا جماعة في موبايل هيخرج يقول أيوة يا ماما جاوبت 4 وسبت 5، أو الحمدلله، كفاية تعب الراجل الأب الجميل طول السنة والدروس الخصوصية”، مضيفًا: “بناشد أولياء الأمور وبقولهم العيال كبرت والسنة الجاية هيروحوا الجامعة”.

وأردف: “أولياء الأمور بيمتحنوا زي العيال بالظبط، وبقولهم أرجوكم أقعدوا في البيت، أول يوم في الامتحانات بيبقى في رهبة أو بيكون صعب وبيكسروا فيه الاحساس بالامتحانات، لكن خلاص سيبوا ولادكم يروحوا ويجوا لوحدهم، أرجوكم مشاهد انتظار أولياء الأمور دي أظن ملهاش مثيل في أي بلد إلا مصر”.

واختتم: “الأب والأم قلبهم بيبقى على عيالهم بشكل غير طبيعي والنهارده فرصة في عيد الأب واجب أقولهم كل سنة وأنتوا طيبين”.