09:42 م
الأحد 30 يوليو 2023
كتب- محمد أبوالمجد:
كشف عاصم خليفة رئيس الاتحاد المصري للإسكواش، تفاصيل إعلان مروان الشوربجي لاعب منتخب مصر للإسكواش، تمثيله لمنتخب إنجلترا مروان الشوربجي، تمثيله إنجلترا، بشكل رسمي، قائلًا: “مكنتش أعرف أي حاجة وصحيت الصبح لقيت الدنيا قايمة مش قاعدة”، مشيرًا إلى أنه تربطه بمروان علاقة جيدة جدًا.
وقال “خليفة” في مداخلة هاتفية لبرنامج “على مسئوليتي” على فضائية “صدى البلد” اليوم الأحد: “مرضتش أكلمه النهارده بعد قراره لأني قلت إنه مش هيرد عليا، ولكن بعد ساعة تفاجئت إنه كلمني وقالي كان لازم أكلمك لأنك وقفت جنبي كتير وميصحش مكلمش”، موضحًا: “قولتله أنت بتكلمني بعد ما أخدت قرارك، وكان رده أن عنده ظروف وحاجات لازم تتعمل لأنه بيعيش في إنجلترا أكثر من مصر ويقوم بالتمرين هو وأخوه محمد الشوربجي في إنجلترا”.
وتابع: “مروان الشوربجي قالي إنتوا معملتوش معايا غير كل خير وهلعب باسم المنتخب الانجليزي، وقالي معنديش حاجه أقولها زي محمد لكنت أنت وقفت جنبي كتير، وعايز أكون ابن بار، ورديت عليه قولتله خلاص ياعم ربنا معاك يعني”.
وأردف، رئيس الاتحاد المصري للإسكواش: “مروان في مكالمته معايا قالي قراري خاص وفردي ومفيش فيه تدخلات من أي حد، وقولتله هل أخوك محمد أثر عليك، قالي لا دا قراري الخاص، وكلم الراعي الخاص به وقاله مش هقدر أكمل”.
وأكمل: “مروان قالي أنا فاضلي سنتين وبخلص وعايز أطمن وأأمن مستقبلي وعايز أحس إن عندي أمن وأعمل عائلة”، مؤكدًا: “بدايق إني أطلع أدافع عن نفسي وعن البلد، لأن مصر بتعمل الحاجة لأولادها ومش منتظرة حاجه من حد”.
وأوضح “خليفة”: “إحنا بنشتغل كويس أوي مع اللاعبين المصريين وبنحاول إننا نعمل كل حاجه نقدر عليها، لكن اللاعبين أصبحت طلباتهم ملهاش سقف”، مؤكدًا أن مروان الشوربجي قام بالتجديد لنادي هليوبلس في أعلى فئة وهي 350 الف جنيه وهو مبلغ كويس، والاتحاد المصري للإسكواش يحاول تقديم كل الدعم للاعبي الإسكواش، ولكن بعض اللاعبين يحسبوا الأمور بأشكال مختلفة، قائلًا: “بيحسبوها الفلوس دي تعمل كام بالدولار، وأنهم يقدروا بنفس المجهود يعملوا فلوس أكتر بره مصر”.
وأشار إلى أن في الخارج تقوم الدول بأخذ منهم أكثر مما يقدموه، قائلًا: “مروان بره مصر هياخدوا منه كتير لأنهم هيقولوا له خد الولاد دول أعملنا جيل جديد، وذلك لأن تجربة إسكواش مصر جيدة جدًا وأي اتحاد في الخارج يحاول أن تكون لديهم هذه التجربة”، مؤكدًا: “بنفكر نوسع القاعدة ونجيب أولاد جدد ونخرج مواهب جديدة والوزير بيساعدني مينفعش أقعد أعيط عشان ولدين مشيوا من عندي، عندنا ناس لازم نشيل من عليهم الصدأ عشان يبانوا عندنا نجوم”.
وأكد “خليفة”: “مصطفى عسل حاليًا رقم واحد في مصر هو وعلي فرج، وإحنا بنحتضن أولادنا ولاعبينا، وأنا زعلت على مروان الشوربجي أكتر من محمد اخوه لأنه كان ولد كويس ومحترم أوي، لأن محمد الشوربجي من وقت ما بدأ كان له حركات بايخة ومروان عمره ما كان كده، وبتمنالهم مستقبل كويس وينجحوا في قرارتهم وتكون قرارات كويسة بتمناها لهم كأب”، ليقاطعه الإعلامي أحمد موسى قائلًا: “حتى لو بيلعبوا باسم منتخب انجلترا”، ليرد خليفة: “اه طبعًا لأنهم ولادي ياسيدي ما إحنا بنلاعب مصريين برده وإحنا بنصدر لإنجلترا حاجات كتيرة”.
